Í lok ágúst voru flugnagildrur Náttúrustofunnar teknar niður en þær eru jafnan uppi frá miðjum maí og fram í ágúst við Víkingavatn, Skjálftavatn og Ástjörn í Kelduhverfi og við Sílalækjavatn og Miklavatn í Aðaldal.
Flugnagildra Náttúrustofunnar
Flugnagildrurnar eru tæmdar þrisvar yfir sumarið og eru þá um leið tekin svifsýni í Víkingavatni og Miklavatni auk þess sem leiðni, sýrustig, hitastig og blaðgræna eru mæld.
Um leið og flugnagildran var tekin niður við Víkingavatn voru hornsíli veidd í vatninu en fylgst hefur verið með stofnsveiflum þeirra frá árinu 2006.
Rannsóknum á vatnalífi er ætlað að styðja við rannsóknir Náttúrustofunnar á vatnafuglum.
