NNA

Vöktun á Bakka

Sumarið 2016 tók Náttúrustofan að sér rannsóknir og vöktun á gróðurfari í nágrenni fyrirhugaðar kísilmálmverksmiðju á Bakka við Húsavík að beiðni PCC BakkiSilicon hf.. Markmið verkefnisins er að fylgjast með gróðurfari í nágrenni verksmiðjunnar og mögulegum áhrifum vegna starfsemi hennar. Gróðurfar verður vaktað með því að fylgjast reglubundið með þekju tegunda og tegundahópa í föstum gróðurreitum.

DJI_0002

Í tengslum við uppbyggingu og rekstur kísilmálmverksmiðju á Bakka við Húsavík tók Náttúrustofan einnig að sér gagnasöfnun á nokkrum umhverfisþáttum að beiðni PCC BakkiSilicon hf. sumarið 2017. Vöktunin er hluti af umhverfisvöktunaráætlun PCC BakkiSilicon hf. fyrir verksmiðjuna.

Vor, sumar og haust 2017 safnaði Náttúrustofan  ýmsum sýnum til efnagreiningar en markmið mælinganna 2017 er að ákvarða bakgrunnsgildi fyrir áframhaldandi umhverfisvöktun á starfsemi kísilmálmverksmiðjunnar:

Í vatni er mæld leiðni, sýrustig og styrkur þungmálmanna arsens (As), kadmíums (Cd), nikkels (Ni), blýs (Pb), kopars (Cu), króms (Cr), sinks (Zr) og kvikasilfurs (Hg) ásamt styrk súlfats (S04), klóríðs (Cl), og PAH-16 efna. Vatnssýni voru tekin úr Reyðará og Botnsvatni.

Í jarðvegi og seti er mældur styrkur brennisteins (S), þungmálma (As, Cd, Ni, Pb, Cu, Cr, Zn og Hg), díoxín, og PAH-16 efna. Í seti er einnig mældur styrkur járns (Fe) og natríums (Na). Jarðvegssýni voru tekin við tvo gróðurreiti í nágrenni verksmiðjunnar og setsýni voru tekin úr Botnsvatni og fjöru við Bakka.

Setsýni úr Botnsvatni.

Heysýni voru tekin af túnum á Héðinshöfða 1 og 2 til mælinga á styrk brennisteins (S) í heyi.

Sýnin eru send til Efnagreininga á Nýsköpunarmiðstöð Íslands sem sjá um greiningu sýnanna.