NNA

Víðförull Þingeyingur

jaðrakanRannsóknir sem nú standa yfir á stofnvistfræði íslenskra jaðrakana Limosa limosa islandica hafa m.a. varpað ljósi á ýmsa þætti í farmynstri þeirra sem áður voru óþekktir. Að sögn Tómasar G. Gunnarssonar doktorsnema í dýravistfræði við University of East Anglia í Englandi hefur ýmislegt forvitnilegt komið í ljós varðandi farhegðun íslenskra jaðrakana. Upplýsinga um farhegðun er safnað með því að veiða og litmerkja jaðrakana þannig að hægt sé að þekkja einstaklinga á færi. Jaðrakanarnir eru merktir með sérstökum litkóðum eins og sjá má dæmi um á myndinni hér til hliðar. Litmerkingin lesist svona: Appelsínugult (orange) yfir grænu ofan hnés á vinstri fæti. Rautt yfir hvítu merki með X (geta verið önnur tákn grafin í merki) ofan hnés á hægri fæti. Stálmerki neðan hnés á vinstri fæti.

Sem dæmi um upplýsingar sem fengist hafa úr þessum rannsóknum má nefna jaðrakan sem talið er að eigi sér óðal í Öxarfirði og hefur sérlega mikinn áhuga á að ferðast um Ísland. Þessi jaðrakan var merktur í Grafarvogi þann 25. apríl árið 2000 en síðan þá hafa upplýsingar um ferðir hans bent til þess að hann fari hringferð um Ísland á hverju ári auk þess að skella sér í vetrarfrí til Írlands. Í seinnihluta apríl kemur þessi jaðrakan við á Suður- og Vesturlandi áður en hann skellir sér norður í Öxarfjörðinn en þar hefur hann sést á varptíma og telst því sannur Þingeyingur. Svo virðist sem hann hafi þörf fyrir að koma aðeins við í höfuðborginni á vorin áður en hann fer norður í sveitina en auk þess að hafa verið merktur þar árið 2000 sást hann þar einnig snemma vors árið eftir. Snemma í vor sást hann síðast við Hegranes í Skagafirði, líklega á leið sinni austur um eftir að hafa farið í gegnum Suður- eða Vesturland. Síðsumars tekur hann sig upp og flýgur austur og suður í gegnum Höfn í Hornafirði. Yfir veturinn hefur þessi þingeyski ferðalangur það náðugt í mildara loftslagi á S-Írlandi en á leið sinni þangað virðist hann koma við á NV-Englandi.

Eftirfarandi upplýsingar hafa borist um ferðir þessa fiðraða Þingeyings:

KK merktur:

24.4.00 Grafarvogur

Séður:

25.4.00 Grafarvogur Faxafloi
26.4.00 Grafarvogur Faxafloi
20.8.00 Höfn, East Iceland E ice
2.5.01 Grafarvogur, Reykjavík, Iceland Faxafloi
9.8.01 Höfn, East Iceland E ice
21.1.03 Wexford Slobs, Co. Wexford, Ireland S Ire
25.4.03 Vogalækur, Mýrum Faxafloi
20.5.03 Silfurstjarnan, Öxarfirði, NE-Iceland NE Ice
27.5.03 Silfurstjarnan, Öxarfirði, NE-Iceland NE Ice
25.7.03 Dee Estuary, Cheshire NW Eng
22.4.04 Hegranes, Skagafirði N Ice

Rétt er að skora á fólk ef það verður vart við litmerkta jaðrakana að koma þeim upplýsingum til Tómasar á netfangið t.gunnarsson@uea.ac.uk  Einnig er hægt að koma upplýsingum til Náttúrustofunnar í síma 464 0450.  Upplýsingar eins og þær af Þingeyingnum sem að ofan var getið byggja á því að almenningur horfi eftir fuglum og lesi á merki séu þeir með slík.

Ef fólk hefur áhuga á því að vita meira um rannsóknir á íslenskum jaðrakönum má smella á eftirfarandi vefslóð http://www.uea.ac.uk/~b072834/

Comments are closed.